अमेरिकालगायत १२ मुलुकद्वारा लेबनान-इजरायल सीमामा २१ दिन युद्धविराम गर्न आग्रह

इजरायल र हेजबुल्लाहबीचको युद्ध चर्कंदै गएपछि अमेरिका, बेलायत र युरोपेली संघलगायतका १२ देशले लेबनानमा अस्थायी युद्धविरामको लागि आह्वान गरेका छन् ।

तीन साता लामो युद्धविरामले द्वन्द्व अन्त्यका लागि कुटनीतिक समाधानका लागि ठाउँ प्रदान हुने र गाजामा युद्धविराम गर्न सम्भव हुने उनीहरूले जनाएका छन् । १२ देशले जारी गरेको संयुक्त विज्ञप्तिमा शत्रुता असहनीय भएको र सीमा क्षेत्रमा जारी जोखिम इजरायल वा लेबनानका जनताको हितमा नभएको बताएका छन् ।

इजरायली सेना प्रमुख हर्जी हलेभीले लेबनानमाथिको भीषण आक्रमणपछि उनीहरूलाई शत्रुको इलाकामा प्रवेश गर्न मार्ग प्रशस्त गर्न सक्ने बताए लगत्तै ती देशहरूको विज्ञप्ति आएको हो । अमेरिकाको न्युयोर्कमा संयुक्त राष्ट्रसंघीय महासभामा विश्व नेताहरूको बैठकपछि विज्ञप्ति सार्वजनिक भएको हो ।

इजरायलले भने दक्षिणी लेबनान र बेका क्षेत्रमा आक्रमण जारी राखेको छ । इजरायली सेनाले बुधबार राति ७५ स्थानमा हेजबुल्लाह लक्षित आक्रमण गरेको जनाएको छ । ती आक्रमणमा कम्तीमा १३ जनाको ज्यान गएको लेबनानको स्वास्थ्य मन्त्रालयले जनाएको छ ।