आज ग्लोबल नेपाली फिल्म अवार्ड, दर्जन बढी सिनेमाकर्मी न्यूयोर्कमा

अमेरिकाको न्यूयोर्कमा सेप्टेम्बर १५ अर्थात आज आइतबार आयोजना हुन लागेको सातौँ ग्लोबल नेपाली फिल्म अवार्डको तयारी सकिएको छ । अवार्ड यो पटक अमेरिकाको न्यूयोर्क राज्यको क्विन्स सहरमा हुन लागेको हो ।

कार्यक्रममा वरिष्ठ कलाकर्मीहरु, नयाँ पुस्ताका कलाकर्मीहरु, विदेशमा रहेका नेपाली कलाकर्मी तथा नेपाली चत्रचित्रलाई माया गर्ने वरिष्ठ व्यक्तित्वहरुको उपस्थिति रहने भने दर्जन बढी नेपाली सिनेमाकर्मी अहिले न्यूर्याेक पुगिसकेका छन् । कार्यक्रममा सहभागी हुन नेपालबाट बरिष्ठ कलाकारहरु अमेरिका आईपुगेका छन् । हास्यकलाकार केदार घिमीरे माग्ने बुढा, नायीका करिश्मा मानन्धर देखी बरिष्ठ अभिनेत्री बसुन्धरा भुषाल न्यूर्याेक पुगेका छन् ।

नेपाल फिल्म सोसाइटी नेपाल, ग्लोबल नेपाली फिल्म अवार्ड यूएसए, त्रिवेणी इन्टरटेनमेन्ट यूएसए र दिलकुमारी फाउन्डेशनको संयुक्त आयोजनामा यो कार्यक्रम हुन लागेको हो । नेपाल फिल्म सोसाइटीका अध्यक्षमा वरिष्ठ नायक कृष्ण मल्ल रहेका छन् भने ग्लोबल नेपाली फिल्म अवार्ड यूएसएको अध्यक्षमा नायक नवराज श्रेष्ठ रहेका छन् ।

साथै त्रिवेणी इन्टरटेनमेन्ट यूएसए र दिलकुमारी फाउन्डेशनका नवराज केसी र खाम भट्टको व्यवस्थापन रहनेछ । कार्यक्रमलाई भव्य र सभ्य ढंगले सम्पन्न गर्न आफूहरु तयारीमा जुटेको अध्यक्ष श्रेष्ठले बताए । कार्यक्रममा १०० देखि १५० जनासम्म कलाकारहरु तथा अन्य विशिष्ट व्यक्तित्वहरु माझ उक्त अवार्ड कार्यक्रम सम्पन्न हुने त्रिवेणी इन्टरटेनमेन्ट यूएसएका नवराज केसीले जानकारी दिएका छन् ।