ममता काफ्ले घटना प्रकरणमा नयाँ मोड – सिग्नल हिल पार्कमा सर्च अपरेसन

ममता काफ्ले घटना प्रकरणले अमेरिकामा नयाँ मोड लिएको छ । अमेरिकाको भजिर्नियाबाट बेपत्ता भएकी ममता काफ्ले भट्टबारे अनुसन्धान गर्न मनसास पार्क प्रहरी दिन रात नभनि लागि परिरहेको छ । साउन १५ बाट हराईरहेकि ममताबारे यकिन तथ्य बाहिर नआए पनि उनको हत्या भएको हुन सक्ने प्रारम्भिक अनुसन्धानले देखाएको छ ।

यतिबेला प्रहरीले ममता काफ्लेको घरबाट दुई माइलको दुरीमा पर्ने सिग्नल हिल पार्कमा सर्च अपरेसन चलाएको छ । त्यहाँ घटना सँग सम्बन्धित केही चिजहरु संकलन गरिएको हुँदा त्यी विषय अनुसन्धानसँग जोडिने किसिमका हुन या होइनन् भन्ने विषयमा जाँच भइरहेको छ ।

उनका श्रीमान् नरेश भट्टलाई नियन्त्रणमा लिएर सुरु गरेको अनुसन्धानले प्रहरीलाई त्यहाँसम्म पुर्‍याएको मनसास पार्क प्रहरी प्रमुखले बताएका छन् । सिग्नल हिल पार्कमा सर्च गरिरहँदा काफ्लेलाई न्याय माग्दै समर्थकहरुले शान्तिपूर्ण प्रदर्शन समेत गरेका थिए । ममताका साथी, सहकर्मी र अधिकारकर्मीले पार्क बाहिर ममतालाई न्याय माग गर्दै प्ले कार्ड बोकेर बसेका थिए ।

ममता १५ साउनबाट सम्पर्कविहीन भएकी थिइन् भने घरमा धेरै रगत बगेकोसहितका तथ्यहरु फेला परेपछि मनसास पार्क प्रहरीले ७ भदौमा नरेशलाई पक्राउ गरेको थियो । नरेश र ममताको घरमा शंकास्पद सामान पनि भेटिएको थियो । घरबाट कार्पेट लगाएत केही सफाइका सामान समेत प्रहरीले लिएको थियो । कोठाभित्र झगडापछि रगक्ताम्मे भएको शरीरलाई बाथरुमसम्म घिसारेर लगेको हुनसक्ने अधिकृतहरुको आशंका छ । अहिले सार्वजनिक भएको कोठा र बाथरुमका तस्वीरहरुले पनि त्यो शंकालाई बल पुर्‍याएको छ । अधिकृतहरुले कोठामा रगत भए नभएको पहिचान गर्न ब्लूस्टार प्रविधि प्रयोग गरेका थिए, त्यसअनुसार, रगत भएको स्थानमा अँध्यारो पारेर हेर्दा निलो रंग देखिन्थ्यो ।

यसरी जाँच गर्दा जति रगतको मात्रा देखिएको छ, त्यसको आधारमा उनी जीवित हुने सम्भावना नरहेको अधिकृतहरुले बताएका थिए । अदालतमा भएको सुनवाइका क्रममा अभियोजक तर्फका वकिलहरुले गरेको बहस अनुसार, ममता जीवित नभएको प्रहरीले निष्कर्ष निकालेको छ । तर भट्टका पक्षमा बहस गर्ने वकिलहरुले भने शरीरबिनै यस्तो गम्भिर आरोप लगाएको भन्दै धरैटीमा रिहा हुनुपर्ने माग गर्दै आएका थिए । अदालति बहस लगत्तै भट्ट समाजका लागि समेत खतरा हुनसक्ने भन्दै उनलाई थुनामा राख्ने आदेश सुनाइएको थियो ।