भारत भ्रमणबारे पूर्वप्रधानमन्त्रीहरूसँग प्रचण्डले मागे सुझाब

प्रधानमन्त्री पुष्पकमल दाहाल प्रचण्डले छिमेकी मुलुक भारतको भ्रमण सन्दर्भमा पूर्वप्रधानमन्त्रीहरूसँग परामर्श गरेका छन् । प्रचण्ड १७ जेठमा भारतको औपचारिक भ्रमणमा जाँदैछन् । सोही विषयमा आइतबार उनले पूर्वप्रधानमन्त्रीहरूसँग परामर्श गरेका हुन् ।

पूर्वप्रधानमन्त्रीहरूले सीमा विवाद, ईपीजीको प्रतिवेदन र हवाई रुटबारे स्पष्ट नेपालको धारणा राख्न प्रधानमन्त्रीलाई सुझाब दिएका छन् । नेपालले नेपाली भूमि कालापानी, लिपुलेक र लिम्पियाधुरा समेटेर नक्सा जारी गरेपछि नेपाल र भारतबीचको सम्बन्धमा उतारचढाव आएको थियो । अहिले त्यो विषयले चिसिएको सम्बन्ध ट्रयाकमा आउने चरणमा छ । यस्तो बेला प्रधानमन्त्रीको हुन लागेको भ्रमणले दुई देशबीचको सम्बन्ध विस्तारमा केन्द्रित हुनुपर्ने सुझाब पूर्वप्रधानमन्त्रीहरूले दिएका छन् ।

छलफलमा पूर्वप्रधानमन्त्रीहरू शेरबहादुर देउवा, केपी शर्मा ओली, माधवकुमार नेपाल र झलनाथ खनाल सहभागी थिए ।