विकाससम्बन्धी छुट्टै ऐनको विधेयक तयार भएको छ : प्रधानमन्त्री प्रचण्ड

काठमाडौं । प्रधानमन्त्री पुष्पकमल दाहालले,विकाससम्बन्धी छुट्टै ऐनको विधेयक तयार भइरहेको बताएका छन् । विश्वासको मत लिने क्रममा प्रतिनिभिसभा बैठकमा बोल्दै उनले,पुरानो विकास योजनाको नीति तथा कार्यक्रमलाई टालटुल गरेर काम चलाउने भन्दा त्यो क्रमलाई भंगगर्न आवश्यक भएको बताए उनले भने ‘ विकाससम्बन्धी छुट्टै ऐनको विधेयक तयार भइरहेको छ । राष्ट्रिय गौरव लगायतका ठूला परियोजनाहरूको निर्माणलाई निर्धारित लागत, गुणस्तर र समयमै सम्पन्न गर्न बजेट र जनशक्ति अभाव नहुने गरी आवश्यक व्यवस्था मिलाइएको छ ।’

उनले ठेक्का लिएर काम पूरा नगर्ने, बीचमै काम छोड्ने तथा काममा विलम्ब गर्ने निर्माण व्यवसायीहरूलाई सचेत गराइएको भन्दै बारम्बार म्याद थप्दा पनि काम पूरा नगर्ने व्यवसायीलाई कालोसूचीमा राखिएको दाबी गरे । आशा गरेभन्दा उत्पादनको क्षेत्रमा कम विकास भएको भन्दै उनले भने हाल प्रयोगमा रहेको विकास योजनाहरुमा पूर्वाधारको व्यवस्थाबाट विकासको ढोका खोल्ने प्रयास भइहरेको बताए । उनले थपे ‘खेतियोग्य जमिन बाँझो हुँदै गएका छन् । युवाहरु रोजगारीका लागि विदेशिने क्रम घटेको छैन् । यो अवस्थाबाट पार पाउन पहिले कार्यान्वयन गरि आएका नीति योजना र कार्यक्रममा टालटुल गर्ने सुधार अब सम्भव छैन् ।त्यसमा क्रमभंग नै जरुरी छ ।’