आज मन्त्रिमण्डलले पूर्णता पाउँदै, यि हुनेछन् मन्त्री

काठमाण्डौं । प्रधानमन्त्री पुष्पकमल दाहालले आज मन्त्री परिषद् बिस्तार गर्ने भएकाछन् । आजै उनले एमाले, रास्वपा र राप्रपालाई सरकारमा सहभागि गराउने तयारी गरेका छन् । एमालेबाट थप ५ मन्त्री र २ राज्यमन्त्री थप गर्ने तयारी भैरहेको छ । एमालेले यस अघिनै ३ मन्त्री सरकारमा पठाएको छ । उपप्रधान तथा अर्थ मन्त्री सहित अन्य २ मन्त्रीलाई सरकारमा पठाएको एमालेले यस पटक सबै मन्त्रीलाई बिभागिय जिम्मेवारी दिने तयारी गरीरहेको छ । एमाले उच्च स्रोतका अनुसार बाँकी चार विभागीय मन्त्रीमा पर्वतका पदम गिरी,सुनसरीकी भगवती चौधरी,सर्लाहीका हरि उप्रेती र कपिलवस्तुका बलराम अधिकारीले मौका पाउने भएका छन् ।

एमालेले यसपाली दुईपटक चुनाव जितेका र अहिलेसम्म मन्त्री बन्न नपाएकामध्येबाट मन्त्री छनौट गरेको हो । त्यस्तै दुई राज्यमन्त्रीमध्ये एक रौतहटका किरण साह हुने भएका छन् । अर्का एकमा पर्साका राजकुमार गुप्ताको चर्चा छ । एमालेले परराष्ट्र, स्वास्थ्य, रक्षा, कृषि, भूमि व्यवस्था, उद्योग र महिला बालबालिका मन्त्रालय पाउने सम्भावना छ । मन्त्रालय मंगलवार विहानसम्म तलमाथि हुने बताइएको छ ।

एमालेबाट यसअघि ज्वाला कुमारी साह,राजेन्द्र राई र दामोदर भण्डारी मन्त्री नियुक्त भइसकेका छन् । यता सत्ता गठबन्धनको चौथो ठूलो दल राप्रपाले उपप्रधानमन्त्रीसहित तीन मन्त्रालय पाएको छ । राप्रपाले उर्जा,सहरी विकास र युवा तथा खेलकुद मन्त्री पाउने समझदारी भएको उच्च स्रोतले जनाएको छ । राप्रपाबाट अध्यक्ष राजेन्द्र लिङदेन उपप्रधानमन्त्री र उर्जासहित सरकारमा सहभागी हुने भएका छन् । बाँकी दुई मन्त्रीको टुंगो पार्टीले मंगलबार लगाउने भएको छ । त्यस्तै, रास्वपाले पनि उपप्रधानमन्त्रीसहित ३ मन्त्री र एक राज्यमन्त्री पाउने भएको छ । सो पार्टीबाट उप सहित गृहमन्त्री रवि लामिछाने सरकारमा गइसकेका छन् ।
अब सो पार्टीले शिक्षा र श्रम मन्त्रालय पाउने भएको छ ।