नीति तथा कार्यक्रम कार्यान्वयन हुनेमा सत्तारुढ दलकै सांसद छैनन् विश्वस्त

सरकारले ल्याएको नीति तथा कार्यक्रम कार्यान्वयन हुनेमा सत्तारुढ दलका सांसदहरू नै विश्वस्त छैनन् । सोमबारको राष्ट्रियसभाको बैठकमा बोल्ने क्रममा सत्तारुढ दलका सांसदहरूले नै सरकारको नीति तथा कार्यक्रम कार्यान्वयन हुनेमा विश्वस्त हुन नसकेको अभिव्यक्ति दिएका हुन् ।

बैठकमा सरकारले प्रस्तुत गरेको नीति तथा कार्यक्रममाथिको छलफलमा भाग लिँदै राष्ट्रियसभा सदस्य नेकपा माओवादी केन्द्रका नेता नरबहादुर विष्टले नेपाली जनताको चाहनाअनुसार राज्यले गर्नुपर्ने दायित्व धेरै भएको र सोहीअनुसार सरकारले नीति तथा कार्यक्रम प्रस्तुत गरे पनि कार्यान्वयन हुन्छ भन्नेमा विश्वस्त नरहेको बताए । उनले हरेक वर्ष नीति तथा कार्यक्रम आउने तर कार्यान्वयन हुन नसक्ने अवस्था रहेको भन्दै यस वर्ष पनि कार्यान्वयन हुनेमा पूर्ण रुपमा विश्वस्त हुन नसक्ने बताए ।

उनले भने, ‘नेपाली जनताको चाहनाअनुसार राज्यले गर्नुपर्ने दायित्व सबै ठाउँमा यसको मुख्य दायित्वहरू पनि छन् । यसको मुख्य चुनौती भनेको कार्यान्वयनको पाटो हो । सधैँभर हामीले नीति तथा कार्यक्रमहरू ल्याउँछौँ । तर कार्यान्वयन गर्दा जेठ १५ गते बजेट आउँदैछ, कार्यान्वयन असारको अन्तिमतिर हुन्छ । तीन महिने अभियान, तीन महिनामा समग्र नेपालको खर्च सक्ने प्रवृत्ति जो छ, त्यो सक्ने प्रवृत्तिलाई नयाँ ऐन ल्याएर हामीले जेठ मसान्तसम्म सक्ने गरी ल्यायौँ भनेपछि यसलाई कार्यान्वयन गर्ने प्रतिवद्धता छ ?’

बैठकमा  राष्ट्रियसभा सदस्य पार्वती रावलले संविधानले भनेको समावेशी र समन्यायिक विकासका आधारमा नीति तथा कार्यक्रम नआएको बताइन् । उनले सरकार स्थानीय तह र प्रदेश सरकारका समस्या समााधान गर्नेतर्फ संवेदनशील बन्न नसकेको आरोप लगाइन् । उनले कर्मचारी नहुँदा स्थानीय तहमा विकास निर्माण कामले गति लिन नसकेको पनि बताइन् ।

बैठकको छलफलमा भाग लिँदै राष्ट्रियसभा सदस्य कांग्रेस नेतृ कमला पन्तले नीति तथा कार्यक्रमका विषयहरू सकारात्मक रहे पनि कार्यान्वयनको चरण चिन्ताको विषय भएको बताइन् । उनले कस्तो बजेट आउँछ भन्नेबाट पनि कार्यान्वयनको बारेमा पत्ता लाग्ने उल्लेख गर्दै भ्रष्टाचार नियन्त्रणप्रति पूर्ण प्रतिवद्ध, हरित अर्थतन्त्र लगायतका प्रकृतिमैत्री अर्थतन्त्रका कार्यक्रमहरू स्वागतयोग्य रहेको बताइन् ।

छलफलमा भाग लिँदै राष्ट्रियसभा सदस्य तथा नेकपा एकीकृत समाजवादीकी नेतृ जयन्तीदेवी राईले नीति तथा कार्यक्रमले सबै क्षेत्रलाई समेटेर प्रस्तुत गरिएको बताइन् । उनले कार्यक्रमहरू राम्रो भए पनि कार्यान्वयनको समस्या भएको उल्लेख गरिन् । उनले  संविधान, संघीयता प्रभावकारी कार्यान्वयन, अर्थतन्त्रको संरचनात्मक सुधार, पुँजीगत खर्चको वृद्धि भ्रष्टाचार नियन्त्रण सार्वजनिक खर्चमा मितव्ययिता, गुणस्तरीय पूर्वाधार निर्माण र शासकीय सेवा प्रवाहमा सुधार र रोजगारी वृद्धि लगायतका पक्ष राम्रा रहेको बताइन् ।

अमेरिका

थप सामाग्री

अमेरिकामा हेलेन आँधीबाट ज्यान गुमाउने २०० नाघे

२०८१ आश्विन १८ गते

सानु मा “ज्योति”को स्वरमा ‘भावना’ सार्वजनिक

२०८१ आश्विन १७ गते

अमर क्षेत्रीको मनको माईक्रोबस बजारमा

२०८१ आश्विन १७ गते

अमेरिकामा हेलेन आँधीका कारण मृत्यु हुनेको संख्या…

२०८१ आश्विन १७ गते

अमेरिकी डिभीको आवेदन आज रातिबाट खुल्दै, के…

२०८१ आश्विन १६ गते

नेजाद्वारा टेक्सासमा पुस्तक विमर्श एवं समाज र…

२०८१ आश्विन १५ गते