मेरिल्याण्डमा २६ बर्षिय नेपाली युवाको गोली हानी हत्या, अर्का नेपाली घाईते – घर जलेर नष्ट

अमेरिकाको मेरिल्याण्डमा गोली प्रहार तथा आगजनीबाट एक नेपाली युवाको मृत्यु भएको छ भने अर्का नेपाली युवा घाईते भएका छन् । शनिवार बिहान भएको गोलीकाण्डमा परि संखुवासभाका एक युवकको मृत्यु हुनुका साथै अर्का नेपाली घाईते भएका हुन् ।

गोली चलाउने ब्यक्ती सहित ४ जनाको ज्यान गएको यस घटनामा मृत्यु भएका नेपाली मेरिल्याण्ड राज्यको वाउन्टीमोर काउन्टीमा रहेको वुडल्यान निवासी २६ बर्षिय युवा रहेको मेरिल्याण्ड राज्य सांसद ह्यारी भण्डारीले सामाजिक संजालमा उल्लेख गरेका छन् । गहिरो दुख ब्यक्त गर्दै श्रद्धाञ्जली सहित उनले पोष्ट गरेको स्ट्याटसमा उल्लेख भए अनुसार गोली चलाउने र आगजनि गर्ने उनिहरुकै छिमेकी ५६ बर्षिय ब्यक्ती हुन् ।

यस घटनामा परि घाईते भएका युवकको उपचार भै रहेको छ । मृतक तथा घाईतेका बारेमा विस्तृत जानकारी आउन बाँकी रहेको यस घटनामा उनिहरु बसेको घरमा समेत आगजनी भएको भएपनि सो घरमा रहेका अन्य भने सकुशल रहेको बताईएको छ ।

सो घटनाका अभियुक्तको पनि प्रहरीको गोली लागि मृत्यु भएको छ । घटनामा नेपालीको घर सहित अन्य दुई घर जलेर पूर्ण रुपमा नष्ट भएको र दुई घर आंशिक रुपमा जलेको स्थानिय संचार माध्यमले जनाएका छन् ।