रविको प्रश्न : प्रधानमन्त्री र गृहमन्त्रीको खुट्टा काँपीसक्याे, मुटु कहाँ चेक गर्ने ?

राष्ट्रिय स्वतन्त्र पार्टीका सभापति रवि लामिछानेले भुटानी शरणार्थी प्रकरणको छानबिनमा प्रधानमन्त्री र गृहमन्त्रीले खुट्टा कमाएको टिप्पणी गरेका छन् ।

संसद बैठकमा उनले भने, ‘प्रधानमन्त्री र गृहमन्त्रीले मुटु दह्रो छ भन्नु भएको थियो । उहाँहरूको मुटु देखेका छौँ । कहाँ गएर चेक गर्ने ? जजसको नाम आएको छ सोधपुछ गर्न किन डराएको ?’

उनले भ्रष्टाचारको छानबिन गर्न संसदीय विशेष समिति गठन गर्न माग गरे । ‘भ्रष्टाचारको विषयलाई बारम्बार कुरा उठाएका थियौँ । तीन दल खुसुर खुसुर बसेका छन् । हामीले आशंका व्यक्त गरेका थियौँ । आज कुनै दल दल बाँकी छैन आरोप लाग्न । अनुसन्धान गर्ने निकायकै प्रमुखहरूकाे नाम आइरहेको छ । अँध्यारो कोठामा गल्लीमा भएको छैन याे काम । दिनदहाडै उज्यालोमा, प्रधानमन्त्री कार्यालयमा, मन्त्री क्वाटरमा र सिंहदरबारमा लेनदेन भएको छ । यसकाे संसदीय समिति गठन गरेर छानबिन गर्नुपर्छ,’ उनले भने ।

उनले नाम मुछिएका सबैलाई छानबिनकाे दायरामा ल्याउन पनि माग गरेका छन् । सभामुख देवराज घिमिरेले लामिछानेका कुरामा ध्यानाकृष्ट भएकाे भन्दै संसदकाे कारबाही अगाडि बढाएका छन् ।